Aruba, Kòrsou, Sint Maarten i Boneiru, Sint Eustatius i Saba

Hurisdikshon riba e islanan

E hurisdikshon riba e islanan ta reglá di un otro manera ku na Hulanda. Tin solamente un kolegio di hurisdikshon pa Aruba, Kòrsou, Sint Maarten i Boneiru, Sint Eustatius i Saba. Esei ta Korte Komun di Hustisia. E huesnan di Korte Komun di Hustisia ta atministrá hustisia tantu den Korte di promé instansha komo den Korte di apelashon (pero no den e mesun kaso). Riba e islanan no ta obligatorio pa tin un abogado pa prosedé.

Den kasashon na Korte Supremo

Despues di apelashon un partido (derecho sivil, derecho penal òf derecho fiskal) por bai den kasashon na Korte Supremo na Den Haag. Si Korte Supremo revoká un veredikto di Korte Komun di Hustisia, e kaso ta bai bèk pa Korte Komun di Hustisia. E ora ei tres hues ku no a trata e kaso anteriormente lo sigui trata esaki.

Derecho sivil

Si un partido bai den kasashon kontra di un veredikto sivil di Korte Komun di Hustisia, e lo mester ser representá dor di un abogado ku ta inskribí na e bali di kasashon sivil. E Reglamento di proseso di Korte Supremo (na hulandes) ta konta den kasonan sivil.

Derecho penal

Den kasonan penal ta importante pa e abogado entregá su eskrito di apelashon (e asina yamá ‘schriftuur’) na tempu kaminda e ta argumentá dikon mester revoká e veredikto di Korte Komun di Hustisia. Den kasonan penal den kasashon tur abogado ku ta registrá na Hulanda òf na Aruba, Kòrsou, Sint Maarten i Boneiru, Sint Eustatius i Saba ta outorisá pa prosedé.

Korte Supremo

Korte Supremo di Reino Hulandes ta e hues di mas haltu na Hulanda den kasonan sivil, kasonan penal i kasonan fiskal. Esaki ta konta tambe pa Aruba, Kòrsou, Sint Maarten i Boneiru, Saba i Sint Eustatius. Korte Supremo no ta un di tres instansha sino hues di kasashon. Esei ta nifika ku Korte Supremo ta husga si e hues ku a trata e echosnan a apliká i interpretá lei korektamente.

Tradukshon: Korte Komun di Hustisia