Corte Supremo: e decision di corte pa habri matrimonio pa personanan di mesun sexo na Aruba y Corsou ta keda mantene

E casonan

Na Aruba y Corsou, abao di legislacion vigente, solamente un homber y un muhe por casa cu otro.  Na cada un di e dos paisnan, un grupo di interes a cuminsa procedura legal hunto cu dos persona di e mesun sexo cu kier casa cu otro.  Nan ta argumenta cu ta contrario na e prohibicion di discriminacion hancra den tratadonan internacional y den Constitucionnan di Aruba y Corsou cu personanan di e mesun sexo no por casa cu otro, mientras cu personanan di diferente sexo por.   Meta di e proceduranan ta pa tambe haci posibel pa personanan di e mesun sexo por casa cu otro.

Sentencia di Corte di Prome Instancia

Corte di Prome Instancia di Aruba a dicta cu, tanten cu parehanan di mesun sexo no por cera matrimonio, si no ofrece un alternativa, manera un sociedad registra of otro entidad huridico, ta contrario na articulo 8 (ley di bida priva y di famia) y 14 (prohibicion di discriminacion) di e Convenio Europeo di Derechonan Humano (EVRM) y cu Pais Aruba pues ta actuando ilegalmente pa cu e demandantenan.

Corte di Prome Instancia di Corsou a dicta cu, en todo caso den ausencia di un alternativa manera un sociedad registra of entidad huridico comparabel, e exclusion di parehanan di mesun sexo for di matrimonio ta contrario na articulo 3 di Constitucion y cu e Pais Corsou ta actua ilegalmente pa cu demandantenan debi na e exclusion aki.

Sentencia di Corte Conhunto di Husticia

Riba apelacion, corte a dicta den ambos caso cu e exclusion di matrimonio pa personanan di mesun sexo ta contrario na e prohibicion di discriminacion hancra den e Constitucionnan di Aruba y Corsou. Segun corte, e sociedad registra, cu recien a introduci na Aruba, no un alternativa completo.  Di acuerdo cu corte, matrimonio tin un balor intrinsico (simbolico y emocional) cu ta transcende e contract di co-habitacion y e sociedad registra. Corte a tene cuenta cu e obhecionnan di oponentenan di matrimonio di mesun sexo hopi biaha tin un base religioso. Libertad di religion mester ta garantisa, pero segun corte e no ta bay asina leu cu un por impone su mes normanan y balornan religioso riba un otro. Corte a dicta despues cu no ta pafo di su tarea legal pa habri matrimonio pa personanan di e mesun sexo. Corte a determina cu, ora su decision bira final, un matrimonio por ser cera dor di dos persona di otro o mesun sexo y cu e ambtenaar di registro civil mester coopera den esaki.

Tanto Aruba como Corsou a apela contra e decisionnan aki na Corte Supremo.

Kehonan di casacion

Durante e audiencia di 10 di november 2023, e Paisnan a confirma na Corte Supremo cu nan ta acepta e sentencia di e corte cu e exclusion di matrimonio pa personanan di e mesun sexo ta contrario na e prohibicion di discriminacion hancra den nan Constitucionnan. Nan ta opone den casacion contra e decision di corte cu hues por habri matrimonio pa personanan di e mesun sexo.  Nan cada un a trece dilanti un cantidad di argumento pa esaki. Tur dos pais ta kere cu ta keda na e legislacion pa elimina discriminacion.

Opinion di Abogado General (AG)

AG Snijders a conseha Corte Supremo dia 22 di december 2023 (ECLI:NL:PHR:2023:1206(Corsou) y ECLI:NL:PHR:2023:1207 (Aruba)) pa mantene e sentencianan di corte.

Decision di Corte Supremo

Corte Supremo ta di opinion cu e sentencianan di corte por ser sostene.

Corte Supremo ta declara prome cu tur cos cu den un caso manera esun den e caso aki, e hues mester balansa dos interes contra di otro: e interes cu por ofrece proteccion huridico efectivo directamente na esnan envolve y e interes cu e hues mester eherce restriccion ora di interveni den un skema statutario. Den e caso aki, ta trata di discriminacion a base di orientacion sexual cu ta stroba esnan envolvi den e libertad pa organisa nan bida personal.  Nan tin un interes significante pa mira discriminacion aboli mas pronto posibel.  Di otro banda, dor di percura pa e deficit huridico mes, hues ta interveni den un ordenansa nacional.  E hues mester eherce frenamento den esaki; e primicia di e legislado ta conta pa ordenansanan nacional. En principio, e legislado tambe ta miho ekipa cu e hues pa evalua cua ahuste ta necesario pa elimina discriminacion. Es mas, den un democracia, pasa dor di e proceso legislativo, parcialmente debi na e envolvimento di parlamento, ta di gran importancia, specialmente ora ta trata asuntonan socialmente sensitivo.

Corte Supremo ta di opinion cu den e caso aki corte por a dicidi di habri matrimonio pa personanan di mesun sexo. Corte a tene cuenta entre otro cu e deficit huridico ta existi pa algun tempo caba, cu e intervencion hudicial no ta tecnicamente complica y cu e manera cu mester habri matrimonio pa personanan di e mesun sexo no ta depende di mas opcionnan politico  cu mester ser haci. Paisnan no a, o no cu exito, contesta e principionan aki den casacion.  Ademas, corte a reconoce e importancia di restriccion hudicial den e relacion cu poder legislativo.  E opinion di corte ta reduci na e echo cu e importancia di mesora por ofrece proteccion efectivo na esnan envolvi ta mas importante den e caso aki.

E sentencia di Corte Supremo ta nifica cu e sentencianan di Corte ta final y cu matrimonio awor ta habri pa hende di e mesun sexo na Aruba y Corsou.

Publicacion riba rechtspraak.nl

ECLI:NL:HR:2024:977 (Aruba)

ECLI:NL:HR:2024:978 (Corsou)